“Апрель элдик революциясынын уюмдарынын ассоциациясы” 21-ноябрда Бишкекте өткөн басма сөз жыйынында президент Садыр Жапаровго кайрылуу кылып, Социал-демократтар партиясынын мүчөлөрү Темирлан Султанбековду, Ирина Карамушкинаны жана Роза Түрксеверди үй камагына чыгаруу сунушун беришти. Алар добуш сатып алууга байланыштуу коюлган айып негизсиз экенин айтышты.
“Үч кишини үй камагына чыгарып деле тергөөнү улантса болот. Себеби, алар коррупционер, террорист эмес. Мамлекетке эч качан зыян келтиришкен эмес”, - деп айтылат кайрылууда.
Апрель окуясына байланыштуу коомдук бирикмелер быйыл “Апрель элдик революциясынын уюмдарынын ассоциациясын” түзүп, ага Темирлан Султанбековду баш катчы кылып шайлашкан.
Бишкектин Свердлов райондук соту 15-ноябрда Социал-демократтар партиясынын лидери Темирлан Султанбековду, партиянын мүчөлөрү Ирина Карамушкинаны жана Роза Түрксеверди эки айга камакка алган.
Аларга Бишкек шаардык милициясы 14-ноябрда Кылмыш-жаза кодексинин “Шайлоочулардын добуштарын сатып алуу” беренеси боюнча кылмыш ишин козгогон. Шектүүлөр коюлган айыпты четке кагып, муну саясий басым-кысым деп баалап жатат.
Кыйноолорго каршы улуттук борбор Темирлан Султанбеков милициянын убактылуу кармоочу жайында турганда 16 саат токтоосуз суракка алынганын, “бул процессуалдык жактан мыйзамсыз” деп даттанганын билдирген. Темирлан Султанбеков ачкачылык кармап жатат.
Бишкек аймактык шайлоо комиссиясы козголгон кылмыш ишин жана тергөөнүн маалыматтарына таянып Социал-демократтар партиясын Бишкек шаардык кеңешине шайлоого катышуудан четтеткен. (BTo)
Дагы караңыз
Мобилдик тиркеме аркылуу акча которууда комиссия алуу убактылуу токтотулатАксыда жер көчтүОн айда Кумтөрдөн 9 тонна 316 килограмм алтын казылдыСот троллейбус зымдарын бузууну токтотууну чечим кылды20-ноябрь: УКМК Жамгырчиевди суракка чакырды, Газада кеминде 15 кишинин өмүрү кыйылдыЖК оң рулдуу машинени такси катары айдоого тыюу салуу долбоорун 1-окууда колдоду