Ош шаарындагы Батыралы Сыдыков атындагы Кыргыз-Өзбек эл аралык университетинин (КӨЭУ) финансы-экономика факультетинин деканы мамлекеттик экзамендерди тапшырууда студенттерден дайыма опузалап акча талап кылып келген деп шек саналууда.
Бул тууралуу 11-сентябрда Улуттук коопсуздук боюнча мамлекеттик комитеттин (УКМК) басма сөз кызматы кабарлады. Шектүү эки суткага УКМКнын убактылуу кармоо жайына камалды.
Атайын кызмат буга чейин Кылмыш-жаза кодексинин "Опузалап пара талап кылуу" беренесинин негизинде аталган окуу жайдын гуманитардык-педагогикалык факультетинин деканы жана декандын орун басары кармалганын кабарлаган.
Декандын кармалышы тууралуу алардын адвокаттары жана университет жетекчилиги комментарий бере элек.
Атайын кызмат 31-июлда абитуриентти жогорку окуу жайга өткөрүү үчүн 84 миң сом алган жаран кармалганын билдирген. (КЕ)