Президенттин "Эл үмүтү" эл аралык стипендиясын алууга катышкан 22 талапкер дүйнөнүн алдыңкы университеттеринде окуунун биринчи жылына, ал эми алты талапкер экинчи окуу жылына стипендия алууга мүмкүнчүлүк алды.
Бул тууралуу Билим берүү жана илим министрлиги маалымдады.
Министрликтин сайтындагы тизмедеги 22 талапкердин ичинен 19у кыз, үчөө эркек.
"Эл үмүтү" стипендиясына ушуну менен үчүнчү ирет талапкерлер тандалды. Былтыр бул стипендияны 17 жаран утуп алган. Алардын 2023-2024-окуу жылында дүйнөдөгү 100 эң мыкты университетке кирген окуу жайларда окуп, магистр жана доктор даражасын алышы үчүн президенттик фонддон 60 миллион сомдой каражат бөлүнгөнү кабарланган. 2022-жылы аталган стипендияны утуп алган тогуз кыргызстандыкка президенттик фонддон 30 млн сом берилген.
Бул стипендия дүйнөнүн алдыңкы 100 университетине өткөн 50 магистрант, докторантка берилет. Акчанын көлөмү тандалып алынган университетке жараша аныкталары жана жыл сайын 50 миң доллардан ашпоого тийиш экени айтылган.
Документке ылайык, техникалык жана инженердик багыттарга артыкчылык берилет. Экономика жана гуманитардык адистиктер боюнча да тапшырса болот.
Илимдин доктору даражасы наамын алууга өзүнчө он стипендия бөлүнөт.
“Эл үмүтү” аттуу эл аралык стипендиялардын жаңы программасын ачуу тууралуу жарлыкка президент Садыр Жапаров 2022-жылы 10-майда кол койгон.
Кыргызстандык студенттердин чет өлкөлөрдө окуусун колдоо боюнча мурда "XXI кылымдын кадрлары" деген улуттук программа иштеген. Ага ылайык, окуу акысын мамлекет төлөп берген студенттер чет өлкөдө университетти бүтүргөндөн кийин Кыргызстанга кайтып келип, мамлекеттик мекемелерде иштеши керек болчу.
Кийинчерээк программаны каржылоо жана уюштуруу иштери аксап, өз максатына жетпей калган.(ZKo)