Түркиянын Кайсери провинциясында дүйшөмбүгө караган түнү жергиликтүүлөр жөө жүрүш уюштуруп, аймактын төрт районунда жашаган сириялыктардын үйлөрүн, дүкөндөрүн жана жеңил автоунааларын талкалаганы кабарланды.
Чыңалуу 30-июнда сириялык качкын беш жашар кызга ыдык көрсөткөнү тууралуу жаңылык соцтармактарда тарагандан кийин башталган. Жүз миңдеген жергиликтүү калк көчөгө чыгып, качкындарга жана түрк бийлигине нааразылыгын билдирген.
"Ихлас" кабар агенттиги түнү 10 полиция кызматкери жараат алганын жазды.
Жекшембиде Кайсери провинциясынын жетекчилиги окуяга байланыштуу билдирүү жасап, беш жашар кызга зомбулук көрсөткөн сириялык качкын кармалганын ачыктады. Ошондой эле полиция аймакта коопсуздук чараларын күчөткөнү да кабарланды.
Kamuoyu Duyurusu⬇️ pic.twitter.com/ZPShf1guYJ
— T.C.Kayseri Valiliği (@kayserivaliligi) June 30, 2024
Түркиядагы оппозициячыл партия мүчөлөрү бийлик миграция саясатын тыкыр көзөмөлгө алышы керектигин билдиришүүдө. Республикалык элдик партиясынын (CHP) депутаты Ашкын Генч: "Күн сайын күчөп бараткан мигранттар кризиси - өкмөттүн ойлонбогон саясатынын натыйжасы", - деп жазды Х баракчасына.
Eskişehir Bağları Danışmentgazi%27de olay yerindeyiz...Her geçen gün daha da büyüyen göçmen krizi, iktidarın umursamaz ve çözüm üretmeyen politikalarının bir sonucu. Türkiye’nin acilen sürdürülebilir, insani değerlere saygılı ve toplumsal huzuru gözeten bir göç politikası… pic.twitter.com/sow5CJ4uHE
— Aşkın Genç (@gencaskn) June 30, 2024
Түркия дүйнөдөгү качкындарды көп кабыл алган өлкөлөрдүн сап башында турат. Учурда өлкөдө 4 миллион 800 миң качкын баш калкалайт. Анын 3 млн 700 миңи сириялыктар.
Өлкөнүн Миграция башкармалыгынын маалыматына караганда, мыйзамсыз жүргөнү үчүн кармалган чет өлкөлүктөрдүн саны жыл сайын өсүүдө.
2005-жылы 57 428 мигрант мыйзамсыз жүргөнү үчүн кармалса, 2023-жылы бул көрсөткүч 232 746га жеткен.
Акыркы 18 жылда дээрлик 2,5 миллион мигрант кармалып, депортация болгон. (ElB)