4-июнда Бишкектин Свердлов райондук сотунда Бишкектеги №1 тергөө абагында жаткан акын жана активист Аскат Жетигендин иши боюнча соттук отурум уланды.
Бул тууралуу “Азаттыкка” акындын адвокаты Самат Матцаков билдирип, бул жолку соттук жараянда иштин материалдарын изилдөө аяктаганын айтты. 5-июнда Аскат Жетигендин социалдык тармактарда жарыялаган видеолору көрүлүп, ал видеолорго корутунду берген эксперттер сурала баштайт.
Улуттук коопсуздук боюнча мамлекеттик комитет (УКМК) Аскат Жетигенди алгач 16-мартта Кочкор районунан кармап, Бишкек шаарына алып келген. Коомдо анын кармалышы катуу талкууланып, бошотуу талабы коюлган. 18-мартта Бишкектин Биринчи Май райондук соту аны эч жакка чыкпоо тилкаты менен бошоткон.
20-мартта УКМК Аскат Жетигенге дагы бир иш козгогон. Ушул эле күнү Биринчи Май райондук соту аны камакка алган.
Учурда Аскат Жетигенге эки кылмыш иши ачылган: биринчиси - 2021-жылы март айында жасалган видео кайрылууга байланыштуу Кылмыш-жаза кодексинин 327-беренеси (“Бийликти басып алууга чакырык жасоо”) менен, экинчиси - быйыл 15-мартта жасаган видео кайрылуудан кийин 278-беренесинин 3-бөлүгү (“Массалык башаламандыктарга чакыруу”) менен козголгон.
Ал буга чейинки соттук отурумдарда 20-мартта соттун камакка алуу чечиминен кийин “УКМКнын Бишкек шаардык бөлүмүндө кыйноого кабылганын” айткан.
Аскат Жетиген - ырчы, комузчу, обончу, композитор, акын. Ал 18 жашында “Ордо Сахна” фольклордук-этнографиялык ансамблине жетекчи болуп, бир нече жыл аны менен жыйырмадан ашык өлкөнү кыдырган. 2021-жылы өзүнүн чакан концертин өткөргөн. Анын “Зарыкканда” жана башка бир канча ыры эл арасында белгилүү.
Аскат Жетиген 2021-жылдан баштап азыркы бийликтин аракеттерин кескин сындаган видео билдирүүлөрдү чыгарып келген. Анын ичинен казинону иштетүү, желекти өзгөртүү боюнча демилгелерге каршы пикирин билдирип, активисттердин камакка алынышын жана маданият тармагындагы иштерди айыптаган. (BTo)
Дагы караңыз
Тянанмэндеги кандуу окуянын 35 жылдыгы: Кытай коопсуздук чараларын күчөттүКыргызстанда 300дөй турак жай, коммерциялык объектинин курулушу мыйзамсыз деп табылдыГазада мерт болгондор 36 миңден ашканы, барымтадагы төрт израилдик каза тапканы кабарланды УКМК "Йакын инкар" агымынын лидерлеринин бири кармалганын маалымдадыМаданият министрлиги Жыргалаңда мамонттун сөөгү табылганын билдирдиДнепрде Орусиянын ракета чабуулунан жараат алгандар арасында бир айлык ымыркай бар экени кабарландыПарламент комитети Зулушевдин кызматтан кетүү арызын колдодуЖалал-Абадда автоунаа коюп кеткен индиялык кыз каза болду