Бишкектин Биринчи май райондук соту Кемпир-Абад иши боюнча айыпталгандардын үчөөнү коргогон эки адвокат келбей калганына байланыштуу 23-апрелдеги отурум болбой калганын билдирди.
Мекеменин басма сөз кызматы тактагандай, судья ишти эки адвокаттын катышуусуз улантуу маселесин койгон. Тараптардын пикирин уккан соң ал соттук процесс мамлекеттик айыптоочулардын айыптоо корутундусун окуу тепкичине келгенин жүйө келтирип, ишти кароону уланткан.
Мындан соң тогуз айыпталуучу буга каршылык билдирип, кыйкырышкан. Төрагалык кылган судья аларды сот залынан чыгаруу чечимин чыгарган. Андан соң ал ишти кароону 24-апрель, саат 14:00гө жылдырды.
Буга чейинки соттук отурумдарда да айыпталуучулар соттук процесс адвокаттарсыз уланып жатканын сынга алып, каршылык билдиришкен. Биринчи май райондук соту бул боюнча берген түшүндүрмөсүндө, 22 соттук отурумдун 11и адвокаттар келбей калгандыктан, 7си айыпталуучулар келбей калгандыктан жылып кеткенин тактаган. Мекеме ошол себептен улам процессти улантуу чечими кабыл алынып жатканын кабарлаган.
Кыргыз-өзбек чек арасындагы Кемпир-Абад суу сактагычынын жери Өзбекстанга өтүп жатканына каршы пикирин билдирген 27 саясатчы, активист жана укук коргоочулар 2022-жылы октябрда камалган. Ушул тапта кармалгандардын ичинен тогуз киши тергөө абагында калды. Калгандары түрдүү жагдайда үй камагына чыккан.
Кемпир-Абад иши 2023-жылы июнь айында сотко өтүп, Ички иштер министрлигинин (ИИМ) Тергөө башкармалыгы ишке “жашыруун” грифин койгон. Милиция аларга Кылмыш-жаза кодексинин “Массалык баш аламандыктар” жана “Бийликти күч менен басып алуу” беренелери менен айып таккан.
Шектүүлөр мунун баарын саясий куугунтук катары сыпаттаган. Соттук жараяндар жабык өтүүдө. Айыпталып жаткандар аны ачык өткөрүү талабын коюп келишет. (ErN)
Дагы караңыз
Улуу Британия Украинага эң ири аскердик колдоо пакетин жарыялайтМадумаровдун адвокаттары райондук соттун чечимине каршы арызданбайтБШК Жусупбек Коргонбай уулун депутаттык мандаттан ажыраттыУкраина Орусиянын дрон жана ракета чабуулу уланганын билдирди Швейцарияда орусиялыктардын камакка алынган активдери кыскарды