Жогорку Кеңештин депутаты Дастан Бекешев 4-апрелдеги сессияда Бишкек шаарындагы жолдордун абалы жана сапатына байланыштуу жоопкерчилик маселесин көтөрдү.
“Жолдор танк менен өтүп кеткендей болуп калды. Акыры бирөө жоопкерчиликке тартылышы керекпи? Муну кандай кылабыз? Буга ким күнөөлүү?” - деди Бекешев.
Жыйынга катышып жаткан Бишкек мэри Айбек Жунушалиев депутатка жооп берип, жолдогу аң-чөнөктөрдү жамоо 27 көчөдө жүрүп жатканын билдирди. Мэр калаада көп жылдардан бери капиталдык оңдоо жүргүзүлбөгөнүн белгиледи.
“Капиталдык оңдоо 2003-жылдан баштап 2017-жылга чейин жүргүзүлгөн экен. Башкача айтканда оңдоо көп жылдардан бери болгон эмес”, - деди.
Бишкекте жаз келгени көчөлөрдүн жолдору жыртылып, аң-чөнөктөр көбөйгөнүнө нааразылыктар айтылууда. Айрым жолдор салынгандан бир-эки жыл өтпөй жарактан чыгып жатканын социалдык тармактардын колдонуучулары жазып, сүрөт-видеолорун жарыялашууда.
Калаадагы жолдордун маселеси 2-апрелде парламентте дагы көтөрүлдү. Буга чейин мэрия “Бишкекасфальтсервис” жолдорду оңдоп, жамоо иштерин жүргүзүп жатканын билдирген. (TSh)
Дагы караңыз
Эмгек министрлиги зомбулукту алдын алуу үчүн 300дөн ашык үй-бүлөнү кыдырган