Энергетика министрлиги бүгүнтөн баштап Бишкек жылуулук электр борборундагы (ЖЭБ) жылуулук берүүнүн активдүүлүгүн жогорулата баштарын билдирди.
Учурда ЖЭБден Бишкек жылуулук тармагына берилген ысык суунун температурасы +61 градусту түзүүдө.
Акыркы күндөрдөгү суукта Бишкектин айрым тургундары көп кабаттуу үйлөрдө жылуулук жакшы берилбей жатканына даттанууда. Бишкек жылуулук тармагы менен түзүлгөн абоненттик келишимге ылайык, үй-жайлардагы температура +18дан төмөн түшпөшү керек.
20-февралда министрлик Жылуулук электр борборундагы жабдуулар эскиргендиктен, кызматкерлер күнү-түнү техникалык жумуштарды улантып жатканын билдирген.
2-февралда таңкы саат үч чамасында Бишкек Жылуулук электр борборунда жарылуу болуп, отказандардын көбү өчүп калган. Бир нече күн жылуулук жана ысык суу берүү чектелип, оңдоп-түзөөдөн кийин калыбына келтирилген. Кырсыктын кесепеттерин жоюу иштери уланууда. (TSh)
Дагы караңыз
Садыр Жапаров Татарстанда Владимир Путин менен жолугат