АКШ космоско X-37B жашыруун аскердик космопланынын жетинчисин учурганын 29-декабрда «Америка добушу» радиосу билдирди. Флорида штатындагы Канаверал тумшугунан учурулган бул космоплан Илон Масктын SpaceX компаниясынын эң оор класстагы, буга чейинки миссиялардан айырмаланып жогорураак орбитага жеткире алчу Falcon Heavy ракетасынын жардамы менен учурулган алгачкы автоматтык аппарат болуп калды.
Буга чейинки беш жолу автоматтык аппаратты учуруу үчүн Boeing жана Lockheed Martin компанияларынын United Launch Alliance биргелешкен ишканасы өндүргөн Atlas V ракета алып жүрүүчүсү колдонулуп келген.
Ал эми алтынчысын 2020-жылдын май айында SpaceX компаниясынын Falcon 9 ракета алып жүрүүчүсү учурган.
Бүгүнкү космостук кеме аба ырайынан жана айрым техникалык көйгөйлөрдөн улам белгиленген убакыттан эки аптадан кийин гана учурулду.
Жакында Кытай да космоско 2020-жылдан бери үчүнчү жолу өзүнүн "Шенлун" автоматтык космопланын учурган.
АКШнын буга чейинки космопланы орбитада эки жылдан ашуун убакыт болуп, Жерге былтыр ноябрда кайтып келген. (RK)
Дагы караңыз
"Орусия Украинаны болгон куралы менен атты"Тажикстан: талкуу жараткан кол чабууОрусия украин шаарларын жапырт аткыладыТҮРКСОЙ кыргыз акын-жазуучуларынын китептерин түрк тилинде чыгарды