Германиянын канцлери Олаф Шольц башында турган башкаруучу коалиция Украинага аскердик жардамды 8 млрд еврого чейин жеткирүүгө макулдугун берди. Бул тууралуу Reuters Берлиндин саясий чөйрөсүндөгү булагына шилтеме кылып жазды. Парламент колдоп берсе, Германиянын коргонуу чыгашасы өлкөнүн ички дүң продукциясынын (ИДП) 2,1% чейин көбөйөт. Бул НАТОго мүчө өлкөлөргө бекитилген чыгашалардын төмөнкү чегинен ашып түшөт.
Reuters маалымдагандай, социал-демократтар, "Эркин демократиялык партиясынын" жана Жашылдар партиясынын мүчөлөрү чыгашаны көбөйтүүнү келерки жылдын федералдык бюджетин талкуулаган учурда макулдашты. Маселени Бундестагдын бюджет комитети 16-ноябрда карайт.
Берлиндин аскердик жардамды көбөйтүү дымагын алгачкылардан болуп, ишембиде Bloomberg агенттиги өз булактарына таянып маалымдаган.
Bild am Sonntag гезити парламент мүчөсү Андреас Шварцтын: "Аскердик чыгашаны эки эсе көбөйтүү - туура жана маанилүү", - деген сөзү менен парламент комитети кошумча төрт млрд евро бөлүүнү бекитип берүүгө тийиштигин жазды. Шварц парламенттеги аскердик бюджетке жооп берет.
Коргоо министрлигинин өкүлү Бундестаг комитетинде маселе талкууланып бүтө электигин айтып, комментарий берүүдөн баш тарткан.
Германия - Украинанын Европадагы башкы өнөктөшү. Киевге берилген жардам боюнча өлкө АКШдан кийинки орунда турат.
Дагы караңыз
ДССУ: Газадагы эң ири оорукана менен байланыш үзүлдүТаштандыдан табылган ымыркай: Эне кармалды. Ата кайда? Парижде антисемитизмге каршы жүрүш өтүүдөСоода борборунда жоголгон кыз боюнча "Адам уурдоо" беренеси менен иш козголдуЛатвияда мурдагы министр Орусиянын пайдасына тыңчылык кылганы үчүн 8,5 жылга кесилдиЖапаров Париждеги саммитте Кыргызстанда мөңгүлөр азайып жатканын айтты