Орусиянын президенти Владимир Путинге Чеченстан жумуриятынын жогорку сыйлыгы – Ахмат Кадыров атындагы орден ыйгарылды. Бул тууралуу Чеченстандын башчысы Рамзан Кадыров Телеграмга жазып, сыйлык «жаңы эле тапшырылганын» кошумчалады.
Анын сөзүнө караганда, Путинге бул орденди ыйгаруу буйругуна 2007-жылы кол коюлган. Андан бери эмне себептен берилбей келгенин тактаган эмес.
Кремлдин расмий сайтына бул тууралуу маалымат чыккан жок. Рамзан Кадыров менен Путин соңку ирет 28-сентябрда жолуккан. 7-октябрда, Путиндин туулган күнүндө Кадыров өлкөдө президенттик шайлоону жоюп салууга же бир эле талапкерди - азыркы мамлекет башчыны көрсөтүүгө элди чакырды.
Орден Чеченстандын биринчи лидери, Рамзан Кадыровдун атасы, маркум Ахмат Кадыровдун урматына 2004-жылы негизделген. Жумуриятты 2007-жылдан бери жетектеп келген Рамзан Кадыров аны биринчилерден болуп алган. Ошондой эле бул сыйлык менен анын кыз-күйөөсү, энеси жана башка тууган-туушкандары сыйланган.
Дагы караңыз
Якутиялык активист Казакстанда уурдалдыИзраилдин бийлиги Газа тилкеси толук блокадага алынганын жарыялады