Кремль Түндүк Кореянын лидери Ким Чен Ын жакыны күндөрү Владимир Путиндин чакыруусу менен Орусияга келерин 11-сентябрда ырастады.
Буга чейин бир катар маалымат каражаттары Ким Путин менен жолугуу үчүн чопкутталган поездде Владивостокко жөнөгөнүн жазышкан.
Ким Чен Ын менен Путин жакын арада Владивостокто жолугуп, Пхеньяндын Москвага курал-жарак жеткирүү маселесин талкуулашы мүмкүн экенин АКШнын бийлиги 4-сентябрда билдирген. Кремль анда бул маалыматты ырастоодон баш тарткан.
Маалыматка караганда, Путин Кимди Орусияга артиллериялык ок-дарыларды жана танктарга каршы ракеталарды жөнөтүүгө ынандырууну көздөйт.
Ал эми Ким Москвадан спутник жана суу алдында жүрүүчү атомдук кемелер үчүн жаңы технологияларды алгысы келет. Түндүк Корея ошондой эле азык-түлүккө муктаж.
Батыштын санкцияларына кабылып, обочодо калган Москва менен Пхеньян Орусия Украинага толук кандуу согуш ачкан 2022-жылдын башынан бери байланышын бекемдөө аракетин көрүп жатат.
Ким Чен Ын менен Владимир Путин соңку ирет 2019-жылы Владивостокто жолугушкан.