Өзгөчө кырдаалдар министрлиги (ӨКМ) Түп районундагы 7-августтагы селдин кесепети тууралуу баштапкы маалыматтарды берди.
Ага ылайык, Талды-Сууда 28, Корумдуда 40тан ашык, ал эми Көөчү айылында 24 үйдү, жалпысынан 92ден ашык тамды суу каптады. Селдин айынан чарбалык жолдор, айдоо аянттары зыянга учурады.
"Өзгөчө кырдаалдар министрлигинин Ысык-Көл облустук башкармалыгына караштуу райондордогу, шаарлардагы бөлүмдөрүнөн жалпысынан 100дөн ашуун куткаруучу беш топко бөлүнүп алып иштеп жатат. Кырсык болгон аймакка кошумча техника тартылды. Учурда бул айылдарда үймө-үй кыдырып, селдин кесепетин тактоо уланып жатат", - деп жазылган маалыматта.
Мунун алдында аталган министрлик аба ырайына байланыштуу чукул кабар таратып, 7-8-август күндөрү нөшөрдөн улам тоолуу жана тоо этектериндеги аймактарда сел жүрүшү ыктымал экенин эскерткен эле. Айрым жерлерде катуу шамал болушу ыктымалдыгын кабарлаган.
Түп районундагы 2-августтагы нөшөрдөн кийин Кең-Суу жана Байзак айылдарында сел жүргөн. Эки кыштакта 50дөй үйдү суу каптаган. Андан сырткары чарбалык жолдор бузулган.
Нарын районунун Куланак айылында 22-июлда айылында нөшөрдөн кийин сел жүрүп, 16 үйдүн короосун суу каптаган.
Дагы караңыз
Түптөгү Талды-Суу, Көөчү жана Корумду айылдарында сел жүрдү Москва: кыргызстандык келин баласын урган деген шек менен камалды Садыр Жапаров "Жаштар жөнүндө" мыйзамга кол койду Ысык-Көлгө май төгүлгөн окуядан улам скутер ээсине айып пул салынды Кыргыз-кытай чек арасы: өткөрмө бекеттеринин иши убактылуу өзгөрөт