“Тазалык” ишканасына атайын техника сатып алууда мамлекетке 8 млн сомдук зыян келтирилгени аныкталды деп Башкы прокуратуранын басма сөз кызматы кабарлады.
Маалыматка ылайык, Бишкек шаарынын мэриясына караштуу “Тазалык” муниципалдык ишканасына беш даана атайын техника сатып алууда мыйзамсыз келишим түзүлгөн.
"Ишкананын тендерлик комиссиясы орточо базар баасын иликтебей, реалдуу бааны аныктабай туруп, 2022-жылдын сентябрь айында “Г.” жеке ишканасы менен 5 даана атайын техника сатып алууга келишим түзүү боюнча чечим кабыл алган. Бирок аталган ишкана келишим түзүүдөн баш тартканына карабай, “Тазалык” ага 466 миң сомдук кепилдик камсыздоосун мыйзамсыз кайтарып берген", - деп билдирди башкы көзөмөл кызматы.
Маалыматта ошондой эле 2022-жылдын 5-октябрында “Тазалыктын” мурдагы директору К.Н. кызмат абалынан кыянаттык менен пайдаланып, атайын техниканы жеке ишканалардын биринен 4 миллион 573 миң сомго
жогорулатылган баа менен мыйзамсыз сатып алганы жазылган.
"Мындан тышкары келишимдеги талаптар сактабагандыгы үчүн чара катары 3 млн. 10 миң 500 сом айып пул өндүрүлгөн эмес. Натыйжада мамлекетке өзгөчө ири өлчөмдө - 8 млн. 49 миң 500 сомдук материалдык зыян келтирилген", - деп белгиленген.
Буга байланыштуу Бишкек шаардык прокуратурасы Кылмыш-жаза кодексинин 337-беренеси (“Кызмат абалынан кыянаттык менен пайдалануу”), 339-беренеси (“Билип туруп пайдасыз келишим түзүү”) менен кылмыш ишин козгоп, тергөө жүргүзүп жатат.
"Тазалык" муниципалдык ишканасына буга чейин да коррупцияга байланыштуу кылмыш иштери козголгон. Улуттук коопсуздук боюнча мамлекеттик комитети (УКМК) быйыл мартта ишканадагы коррупциядан бюджетке 5 миллион сомдон ашык суммада зыян келтирилгенин билдирген.
Былтыр Бишкек мэриясы “Тазалык” муниципалдык ишканасында бир катар каржылык мыйзам бузуулар аныкталганын кабарлаган. Борбор калаада таштанды маселеси курчуп, былтыр август айында мэриянын дарегине "Бишкек таштандыга толуп кетти" деген сын көбүрөөк айтыла баштаган. Ишканадагы “коррупциялык схема” боюнча териштирүүлөр жүрүп жатканы айтылып, жумушчулар митингге чыккан учурлар катталган.
"Тазалыкта" жалпысынан 1500 киши иштейт. Ишканада соңку бир жарым жыл ичинде төрт жолу жетекчи алмашты. Ага жетекчи болуп 2021-жылдын декабрында Азат Сагынов дайындалган. Төрт айдан кийин, 2022-жылдын апрель айында анын ордуна Султан Алыбаев барган. Анын ордуна ошол эле жылдын июль айында Нурлан Касымов иштей баштаган.
Касымов быйыл январда өз арызы менен кызматтан кеткени айтылып, анын ордуна Бишкектин мэри Эмилбек Абдыкадыровдун жарлыгы менен азыркы жетекчи Рамиз Алиев дайындалган.
"Тазалык" жана Бишкек мэриясы прокуратуранын маалыматына комментарий бере элек. (ZKo)
Дагы караңыз
"Менчик корголуп, укуктар сакталышы керек". Өкмөттүн алты айлык иши, ишкерлердин сунушу Динара Кутманова Камчыбек Ташиевдин дооматтарын четке какты Австралия Орусиянын 35 ишканасына санкция киргиздиКечки радио эфир | 20.07.2023 | УКМК АКШнын санкциялык чектөөсүн бузууга байланыштуу иликтөө баштадыУлуу Британия Олег Тиньковго каршы санкцияны токтотту