Өзгөчө кырдаалдар министрлиги (ӨКМ) Кыргызстанда жыл башынан бери 52 адам сууга чөгүп каза болгонун билдирди. Ага ылайык, былтыркы жылдын ушул маалына карата кырсык 25% өскөн.
Мунун алдында, 5-июлда Ички иштер министрлиги (ИИМ) соңку алты айда 60тан ашык жаш бала, өспүрүм сууга чөгүп каза болгонун кабарлаган. Мындан улам милиция коопсуздук чараларын күчөткөнүн маалымдаган.
"Жайкы эс алуунун башталышы менен балдардын коопсуздугун камсыз кылуу өзгөчө актуалдуу маселелердин бири. Буга байланыштуу негизги тапшырма Жаш өспүрүмдөр менен иштөө инспекциясына берилген. Жай мезгилинде коомдук тартипти сактоо үчүн укук коргоо органдары көлмөлөрдө, адамдар көп жүргөн жерлерде патрулдук иш-чараларды жүргүзүп жатат. Милиция кызматкерлери эс алуучуларга атайын бөлүнгөн жайларда гана сууга түшүүнү, ата-энелерге балдарды кароосуз калтырууга жол берилбесин, балдарга чоң кишилердин катышуусунда гана сууга түшүүгө болорун эскертет",- деп жазылган маалыматта.
ӨКМнын маалыматына ылайык, былтыр 85 адам сууга чөгүп каза болгон жана мындай кырсыктардын эң көбү жайкы сезондо Чүй, Ош, Ысык-Көл облустарында катталган. Каза болгондордун 28и 12 жашка чейинки балдар.
ӨКМ быйыл сууга чөгүп каза болгондор былтыркыдан көп экенин билдирди
Дайынсыз жоголгон 7 жашар баланы издөө. Нарын суусу, Таш-Көмүр шаары. 20-июнь, 2023-жыл.