Кыргызстандын орто мектептеринин бүтүрүүчүлөрүнүн жана абитуриенттердин арасында өткөн Жалпы республикалык тестирлөөнүн жыйынтыгы белгилүү болду.
Билим берүү жана илим министрлиги маалымдагандай, 2023-жылы жалпы республикалык тестирлөөдө 54 окуучу эң жогорку упай топтоп, “Алтын сертификат” алуу укугуна ээ болду.
Алардын ичинен эң көп - 236 упайды Ош шаарындагы Киров орто мектебинин бүтүрүүчүсү Кызжибек Жээнбекова менен Бишкектеги №61 физика-математикалык лицейдин окуучусу Нурсейит Төрөбаев алышты.
234 упайды Бишкек шаары, “Гарвард Интернешнл” мектебинин бүтүрүүчүсү Елизавета Алпацкая менен Бишкектеги “Маариф” мектебинин окуучусу Аделя Сейитова алышты.
Жалпысынан Бишкек шаарынан – 39, Ош шаарынан жана Ош облусунан – 4, Чүй облусунан – 2, Ысык-Көл облусунан – 2, Нарын облусунан – 2, Баткен облусунан – 2, Талас облусунан – 2, Жалал-Абад облусунан – 1 окуучу “Алтын сертификат” алат. Ага илингендердин ичинен 11 бүтүрүүчү эң аз - 223 упай топтогон.
2022-жылы Кыргызстанда ЖРТ сынагын 50 154 бүтүрүүчү тапшырган. Эң жогорку 235 упайды баш калаанын №70 мектеп-гимназиясынын окуучусу алган. "Алтын сертификатка" 57 окуучу татыктуу болгон. Орточо упай 124,4 болгон.
2021-жылы эң жогорку көрсөткүч 232 упай болсо, 2020-жылы 229 упай болгон.
Жыл сайын 40 миңден ашуун бүтүрүүчү жалпы республикалык тестирлөөгө катышат. Анын жыйынтыгына жараша аларда жогорку окуу жайларга бюджетке өтүү мүмкүнчүлүгү берилет. (ZKo)