Орусиялык рэпер Моргенштернди Бишкекте өтө турган Alga Fest музыка фестивалына катыштырбоо аракети болуп жатат. Бул тууралуу 16-июнда Жогорку Кеңештин “Ата-Журт Кыргызстан” фракциясынын жыйынында маданият, маалымат, спорт жана жаштар саясаты министри Алтынбек Максүтов айтты.
Жыйында депутат Алишер Козуев рэпер Моргенштерндин Кыргызстанга келишине каршы экенин билдирип, Маданият, маалымат, спорт жана жаштар саясаты министрлигин чара көрүүгө чакырды. Алтынбек Максүтов депутатка мындай жооп берди.
“Моргенштерн боюнча иш алып барып жатабыз. Тапшырма бердик. Имараттын (концерт боло турган) жетекчиси менен да сүйлөштүк. Бул боюнча биздин да пикир сиздикиндей эле. Анткени Моргенштернге Орусияда кылмыш иши козголгон экен”.
Бишкекте 23-24-июнь күндөрү Alga Fest музыка фестивалы өтөт. Ага жергиликтүү жана чет элдик артисттер катышат. Концерттин биринчи күнүндө орусиялык рэпер Моргенштерн ырдай турганы көрсөтүлгөн. Ал Bishkek Arena имаратында өтөт.
Моргенштерндин толук аты-жөнү Алишер Моргенштерн. Ырчынын Ютуб каналында 12 миллионго жакын катталуучу бар. Ал Украинадагы согушту ачык сындаган. Аны Орусиянын Юстиция министрлиги “чет элдик агент” тизмесине киргизген.
Моргенштерндин Бишкекте ырдашына социалдык тармакта да айрым адамдар каршы болушууда. (BTo)
Дагы караңыз
Орусияда “тыңчы” тизмесине былтыр 188 адам жана уюм киргизилгенОшто жер көчкү коркунучунан улам 39 киши коопсуз жайга көчүрүлдүКүрөш (U23): Бейшекеев менен Жанышов жаштар арасында Азия чемпиону болуштуЕвропарламент Украинаны НАТОго кабыл алуу жараянын баштоого чакырдыӨзбекстанда кыйноого айыпталган мурдагы милиционерлер соттолдуМАГАТЭнин башчысы Запорожье атомдук станциясына барды