Орусиянын аскердик блогерлери орус күчтөрү Украинанын Луганск облусундагы Кременная шаарынын айланасында чоң жоготууга учураганын кабарлашты.
Бир нече Телеграм-канал жарыялаган маалыматка ылайык, генералдын келишин күтүп турган орус аскерлерине украин күчтөрү сокку урганда ондогон жоокер каза болгон. Бул маалыматты бөлүшкөн "Рыбарь", "Старше Эдды", "Повёрнутые на Z войне", "Два майора" жана "Zаписки мичмана Птичкина" Телеграм-каналдарынын жалпы катталуучуларынын саны 3 миллиондон ашат.
Каза болгондор жана жаракат алгандар тууралуу так маалымат айтылбайт, түрдүү булактарда алардын саны 50дөн 100гө чейин деп көрсөтүлүүдө. Ошондой эле Телеграм-каналдар жоокерлер күткөн генералдын аты-жөнүн да жазышкан эмес.
Айрым такталбаган маалыматтарга караганда, сөз буга чейин "Чыгыш" аскер бөлүгүн жана Тынч океан деңиз аскерлеринин 155-бригадасын жетектеген генерал-майор Сухраб Ахмедов жөнүндө болуп жатышы мүмкүн. Буга чейин аталган бригада Приморье крайынын губернаторуна ачык кат жазып, Донецк облусунун Павловка айылындагы чоң жоготуулар үчүн Ахмедовду айыптаган.
Орусиянын Коргоо министрлиги блогерлер жарыялаган маалыматка комментарий берген жок. Украинанын куралдуу күчтөрү да Кременнаяны көздөй сокку урулганын маалымдаган эмес.
Дагы караңыз
Херсондогу суу ташкыны кеминде 28 өмүрдү кыйдыИликтөө: Орусия тарапта согушкан борборазиялык 93 жаран Украинада каза болдуЧолпон-Ата шаарында "Акылман" деп аталган президенттик лицей ачылат