Президент Садыр Жапаровдун тапшырмасы менен Балыкчы-Бөкөнбаев-Каракол жолунун курулушун иликтөө үчүн мекемелер аралык комиссия түзүлдү. Бул тууралуу транспорт жана коммуникациялар министри Тилек Текебаев Ысык-Көлдө иш сапар менен жүргөндө билдирди. Ал Фейсбуктагы баракчасына жумушчу топко бир апталык мөөнөт берилгенин жазды.
"Мекемелер аралык жумушчу топко бир жуманын ичинде курулуш иштеринин жүрүшүн, жолдун Балыкчы-Барскоон тилкесин (0дон 141,7 чакырымга чейин) куруу маселесин комплекстүү изилдеп, жолдун курулушун андан ары ишке ашыруу боюнча сунуштарды киргизүү тапшырмасы коюлду. Мындан улам мен өзүм жумушчу топ менен бирге ишти жеринен көрүү үчүн Ысык-Көлгө иш сапарым менен келдим",-деген Текебаев.
Ысык-Көлдүн тескейиндеги Балыкчы - Бөкөнбаев - Каракол жолунун курулушу 2021-жылдын августунда башталган. Анын жалпы узундугу 144 чакырым. Төрт тилкелүү, ортосуна тосмо коюла турган жол президент Садыр Жапаровдун демилгеси менен “Кумтөрдүн” акчасына курулуп жатканы маалымдалган.
Кыргызстанда үчүнчү категориядагы бир чакырым автожолду реконструкциялоого 400-600 миң доллар, экинчи категориядагы жолго 1 - 1,5 миллион доллар кетет. Бир чакырым жаңы жолду курууга татаалдыгына жараша 2 миллион доллардан ашык каражат сарпталат.
Дагы караңыз
Жапаров темир жол куруу долбоорунун негиздемеси даяр экенин айттыАКШнын санкцияга байланыштуу өкүлдөрү Кыргызстанга келди ЖК: президенттин Оштогу өкүлү кандай жагдайда иштен кеткени айтылдыСадыр Жапаров чек ара кагыштарында мерт болгондорду эскерип кайрылуу жолдоду ПАСЕ Орусиянын украин балдарды чыгарып кетишин геноцид деп тааныды