Улуттук коопсуздук боюнча мамлекеттик комитет (УКМК) эл аралык террористтик уюмдун активдүү жактоочусу кармалганын билдирди.
А.К. аттуу шектүү 28 жашта, Жалал-Абад облусунун тургуну. Ал Кыргызстандын Коргоо министрлигинин атайын бөлүмдөрүндө кызмат өтөгөн.
Атайын кызматтын маалыматына караганда, шектүү 2022-жылдын аягында Кыргызстандан чыгып кеткен жана эл аралык террористтик уюм тарабында куралдуу кагылышууларга катышуу үчүн Сирияга өтүп кетүүгө аракет кылган.
Бул факты боюнча Кылмыш-жаза кодексинин “Кылмыш жасоого аракеттенүү” - “Кыргызстандын жаранынын чет мамлекеттин аймагындагы куралдуу жаңжалдарга же согуш аракеттерине катышуусу же террордук актыны жасоо үчүн даярдыктан өтүшү” боюнча кылмыш иши козголду. Кармалган адам УКМКнын Жалал-Абад облусу боюнча башкы башкармалыгынын тергөө абагына киргизилди.
Ыкчам-иликтөө иш-чаралары уланууда.
УКМКнын маалыматында, Сириянын согуш болуп жаткан аймактарына 2013-2015-жылдары Кыргызстандан 850 киши кетип, анын 150сү ошол жакта набыт болгон.
Өзү каалап же азгырык жолу менен “Ислам мамлекети” террордук тобуна кошулган кыргызстандыктардын 140ка жакыны - аялдар. Быйыл 16-февралда "Айкөл" миссиясы аркылуу Сириядан 18 аял жана 41 бала кайтарылган.
Сириядагы кыргызстандыктардын туугандары бийликке кайрылып, аларды мекенге кайтарууга жардам сурап келет. (КЕ)