Ош шаарындагы Орусиянын консулдугу жайгашкан имарат Жогорку Кеңештин депутаты Надира Нарматовага таандык экенин 14-октябрда “ПолитКлиника” медиасы жазып чыкты.
“Орусиянын Ош шаарындагы консулдугу К.Бобулов 77 дарегинде жайгашкан. Бул консулдуктун расмий сайтында дагы көрсөтүлгөн”, - деп билдирди басылма.
Иликтөөчү журналисттер Орусиянын дипломатиялык консулдугу имаратты 2009-жылдан бери ижарага аларын аныкташкан. "Кадастр" мамлекеттик мекемесинин маалымат базасынан алынган расмий документтердин сүрөтү кошо жарыяланды.
Депутат Нарматова өзү бул имаратка азыр тиешеси жок экенин айтууда.
“2009-жылы мен кредитке алган имарат. 13 жылдан бери насыя төлөп жүрүп, төлөй албай, өткөн жылы банкка өтүп кеткен. Менде эмес ал имарат”, - деп билдирди ал "Азаттыкка".
2021-жылы Нарматова парламентке "Ата-Журт Кыргызстан" партиясынын тизмеси менен шайланган. Ал Жогорку Кеңештин 2010-жылдагы бешинчи чакырылышынын депутаты болгон. Эл өкүлү быйыл февралда “Чет өлкөлүк агенттер” тууралуу мыйзамды кабыл алууну сунуштаганы белгилүү. Бул мыйзам долбоорун ал 2014-жылы Турсунбай Бакир уулу жана жана Нуркамил Мадалиев менен бирге демилгелеген.
Соңку күндөрү Нарматова Кыргызстандагы жемкорлук, коррупцияга аралашкан аткаминерлер тууралуу жазган көз каранды эмес алдыңкы жалпыга маалымдоо каражаттары – “Азаттык”, “Клооп” жана “Кактус Медиа” басылмаларын жабууга кол топтоп жатканы тууралуу маалымат тарап жатат. Депутат өзү муну четке каккан. (BTo/RK)
Дагы караңыз
BBC: Орусиянын Украинадагы жоготуулары 7,5 миңден аштыПрезидент Жапаров чек арадагы талашты тынч жол менен чечүү керектигин айтты2023-жылы КМШ уюмуна Кыргызстан төрагалык кылатОрусиядагы мобилизация: жаныңды куткар, мигрант