Улуттук коопсуздук боюнча мамлекеттик комитеттин (УКМК) төрагасы Камчыбек Ташиев кыргыз-өзбек чек арасы боюнча келишимдин долбооруна ылайык, Кемпир-Абад суу сактагычы жайгашкан 4485 гектар Өзбекстанга өтүп, анын ордуна Ош жана Жалал-Абад облустарынан жалпысынан 18 миң гектардан ашуун жер Кыргызстанга алына турганын айтты. Соңку макулдашууларга ылайык, Кыргызстандын картасы 15 миң 806 гектарга кеңейет. Бул тууралуу ал 10-октябрда Жогорку Кеңештин тармактык комитетинин жыйында маалымат берип жатып билдирди.
Атайын кызматтын башчысы Кемпир-Абаддагы сууну сегиз адамдан турган кыргыз-өзбек биргелешкен ишканасы көзөмөлдөй турганын айтты. Суунун деңгээлин 908 горизонттон 900гө түшүрүүдө 1246 гектар жер бошоп, аны жергиликтүү тургундар колдонсо болорун кошумчалады. Эгерде суу агып кете турган болсо, анда анын жерине Өзбекстан ээлик кылып кала берет.
Ташиев Кыргызстанга өттү деп билдирген жерлер:
- Гавасай 12 872 гектар,
- Көк-Серек 105 гектар,
- Баястан 212 гектар,
- Унгар-Тоо 35 гектар,
- Кара-Белес 25 гектар,
- Ак-Таш 100 гектар (Кара-Суу району),
- Шарихан каналынын башталышынан 19,5 гектар (жерди эки тарап бири-бири менен алмашты).
- Өзгөн жана Сузак райондорунда 1000 гектар.
Кыргыз-өзбек чек арасын тактоо иштери боюнча маселе Жогорку Кеңештин Эл аралык иштер, коргоо, коопсуздук жана миграция боюнча комитетинде каралып жатат. Жыйынга сүрөт, аудио, видео тартууга тыюу салынган. Ташиев кыргыз-өзбек чек арасы боюнча келишимдин долбоорун жабык кароонун себептерин айтып, жашыруун маалыматтар айтыла турганы менен түшүндүргөн. Айрым депутаттар жыйындын башында буга нааразылыгын билдирип, макулдашуу боюнча документтер толук эместигине, отурум тууралуу кеч кабар берилгенине нааразы болушту.
Кыргыз бийлиги кыргыз-өзбек чек арасын тактоо иштери аяктап калганын жарыялаган. Апта башында негизи документтерде Анжиян суу сактагычы деп жүргөн, Кемпир-Абад суу сактагычына байланыштуу нааразылык чыккан. (КЕ/AiB)
Дагы караңыз
Кыргызстанда 90 адам COVID-19 жуктурганы аныкталганТашиев чек ара боюнча жыйындын жабык өтүшүнүн себебин айттыБишкекте Гейдар Алиев жана Низами Гянжеви атындагы мектептер ачылатАба ырайы: жаан жаабайт