Баткенде тажик тараптын кол салуусу учурунда жардырылганы айтылган көпүрө убактылуу калыбына келтирилип, кыймыл кайра жанданды. Бул тууралуу 20-сентябрда транспорт жана коммуникация министринин орун басары Таабалды Тиллаев билдирди.
“Өзүңүздөргө белгилүү болгондой, тажик аскерлери жардырган көпүрө ушул 36 метрлик, Ак-Сайга кеткен көпүрө. Көпүрө аркылуу жүрүү мүмкүнчүлүгү чоң машиналар үчүн да, жеңил машиналарга да бар”, - деди Тиллаев.
Тиллаев көпүрөнү жаңылап кайра куруу үчүн техника мобилизация болуп, иш башталганын кошумчалады.
Транспорт жана коммуникация министрлигинин маалымат кызматы "16-сентябрда Баткен районундагы Көк-Таш – Ак-Сай – Тамдык автожолунун жетинчи чакырымындагы Дача – Чайхана тилкесинде Ак-Суу дарыясына курулган көпүрөнү тажик аскерлери жардырган" деп билдирген. Тажик тарап бул боюнча комментарий бере элек.
Быйыл 14-17-сентябрда кыргыз-тажик чек арасында кан төгүлгөн окуяны Кыргызстандын Тышкы иштер министрлиги "Тажикстандын алдын ала пландаган куралдуу агрессиясы" деп атады. Анын алдында Тажикстандын Тышкы иштер министрлиги ушундай эле мазмунда айыптаган билдирүү жарыялаган. Кыргызстан бери дегенде 59 жаранынан айрылды, алардын кыркы аскер кызматкери экени айтылды, чек арадагы кыргыз айылдарынан коопсуз жайларга убактылуу көчүрүлгөндөр 140 миңден ашты. Тажикстандын Тышкы иштер министрлиги чек арада 41 жараны каза болгонун билдирди. (RK)
Дагы караңыз
Баткен: талкаланган мечит, чачылган өрүк Армения менен Азербайжандын башкы дипломаттары жолугуштуБаткенде алгачкы эсеп боюнча 364 турак жай жабыркаганы кабарланды10 миңдей этникалык кыргыз документ ала албай жүргөнү парламентте айтылды