Касым-Жомарт Токаев Казакстан элинин жана жеке өзүнүн атынан Кыргызстандын элине кыргыз-тажик чек арасындагы куралдуу кол салуудагы жоготуулары үчүн терең кайгыруу менен көңүл айтты. Казак президенти кыргыз элине тынчтык жана бакубаттуулук каалаган.
"Достук, ынак коңшулук мамилени сактоо - Борбор Азиядагы бир тууган элдин ата-бабаларынан бери келе жаткан негизги милдет. Казакстан бардык талаштуу маселелерди тынч, дипломатиялык жол менен чечүүнү жактайт",- деп жазылган казак президентинин телеграммасында.
Касым-Жомарт Токаев ушундай эле маанидеги көңүл айтууну Дүйшөмбүгө да жолдогон.
Кыргыз-тажик чек арасындагы соңку куралдуу кол салууда Кыргызстан кеминде 59 жаранын жоготту. 19-сентябрда жалпы өлкөдө аза күтүлдү.
Куралдуу кагылыштан 183 адам жаракат алып, 140 миңден ашуун адам коопсуз жакка убактылуу жер которду.
Тажикстандын бийлиги чек арадагы кагылышта 41 жараны мерт кеткенин 19-сентябрда расмий маалымдады.
Бул маалыматтарды көз карандысыз башка булактардан тастыктоого мүмкүн болбой жатат.(ZKo)