Президент Садыр Жапаров 13-августта Өзгөчө кырдаалдар министрлигине жаңы атайын техниканы тапшырды. Бул тууралуу мамлекет башчысынын маалымат кызматынан кабарлашты. Маалыматка ылайык, министрликтин түзүмдөрүнө Airbus H-125 тик учагы, автобустар, экскаваторлор, жол тандабастар, 150 мобилдик үйлөр жана башка техникалар тапшырылды. Президенттин маалыматына караганда, бул техниканы алуу үчүн республикалык бюджетттен 384 миллион сом бөлүнгөн.
Жапаров кийинки жылы да бюджеттин эсебинен дагы бир тик учак сатып алуу пландалып жатканын жана Азия өнүктүрүү банкынын колдоосу менен бир нече атайын техника алынарын кошумчалады.
Март айында Дүйнөлүк банк "Табигый кырсыктардын тобокелдигине туруктуулукту жогорулатуу” долбоорунун алкагында Кыргызстанга 58 өрт өчүрүүчү автоунаа алып берген.
Өлкөдө буга чейин өзгөчө кырдаалдарда атайын техникалар жетишпестиги курч маселе катары көтөрүлүп келген.(BkA)