Саясат талдоочу Марат Казакпаев менен бирге кармалган Кыргызстандагы казак диаспорасынын мурдагы башчысы Марат Токтоучиковго карата сот өкүмү чыгып, ал 2,5 жылга эркинен ажыратылганын 4-июлда Бишкектин Биринчи Май райондук соту билдирди.
Мекеменин маалыматына караганда, өкүм 27-июнда чыкты. Токтоучиков Кыргызстандын Кылмыш-жаза кодексинин (эски редакциядагы) “Мамлекеттик чыккынчылык кылуу” деген 307-беренесинин негизинде күнөөлүү деп табылып, жаза мөөнөтүн жалпы режимдеги колонияда өтөмөй болду.
Токтоучиков жана Казакпаев кармалганы 2021-жылдын апрелинде белгилүү болгон. Алар Улуттук коопсуздук боюнча мамлекеттик комитеттин (УКМК) тергөө абагына камалышкан.
56 жаштагы илимдин доктору, профессор Казакпаев быйыл 10-июнда абактан эс-учун жоготкон абалда ооруканага жеткирилип, ошол жакта көз жумган. Ал каза болгонуна байланыштуу иши кыскартылганын Бишкектин Биринчи Май райондук соту 30-июнда билдирген.