НАТОнун мүчөлөрүнүн бири Түркия мурда жарыялаган позициясын карманып, Финляндия менен Швециянын аталган уюмга кирүүсү боюнча сүйлөшүүлөргө бөгөт койду. Бул тууралуу германиялык DPA маалымат агенттиги кабарлады.
Анкара Хельсинки менен Стокгольм Түркияда террордук уюм деп табылган Күрдистан жумушчулар партиясын колдойт деп күнөөлөп келет.
Түркия сүйлөшүүлөр учурунда аталган эки өлкөнү бул уюмду коомчулук алдында айыптоосун талап кылды. Financial Times басылмасы жазгандай, түрк бийлиги мындан сырткары Швециядан террорчулукка шектелген 30 адамды экстрадициялоону талап кылды.
Түркиянын президенти Режеп Тайып Эрдоган аталган уюмга Финляндия менен Швецияны кошууга каршы экенин, алардын арызына бөгөт коёрун 13-майда жарыялаган.
18-майда Швеция жана Финляндиянын элчилери Брюсселде НАТОнун Баш катчысы Йенс Столтенбергге аскердик блокко кошулуу арыздарын тапшырышты. Столтенберг аларды кабыл алуу жараяны ыкчамдатылган тартипте жүрөт деп үмүттөнөрүн белгиледи.
Орусия Украинага кол салгандан кийин эки өлкө тең салттуу нейтралитет макамынан баш тартып, НАТОго кирүүнү чечкен. Ага кирүү альянска мүчө мамлекеттердин бардыгынын бир добуштан колдоосун талап кылат.
НАТО (Түндүк атлантикалык аскердик уюм) 1949-жылы АКШны жана Европаны СССРдин таасиринен коргоо үчүн түзүлгөн. Алгач 12 мамлекет кирген. Учурда АКШ, Британия, Канада, Франция, Германия баштаган 30 мамлекет мүчөлүк кылат. Түркия уюмга 1952-жылы кошулган. (ErN)
Дагы караңыз
Кызыл Чырым “Азовсталдан” чыгарылган аскерлерди каттап жатканын маалымдадыЧаткал: Шыбы ураган мектептин окуучулары кайрадан текшерилмей болдуМенчик билим берүү борборунун жетекчиси мыйзамсыз миграция уюштурган деп айыпталуудаУКМК Жайыл райондук соттук-медициналык экспертиза башчысын кармады Рахимов президенттин чек ара айылдарын өнүктүрүү боюнча өкүлү болду