Жалал-Абад шаарында 18-мартта катуу жааган жамгырдан Көк-Арт дарыясынын деңгээли көтөрүлүп, Живпром участкасында жайгашкан №10 дамбанын сол жээгин жеп кеткен. Натыйжада 569 үйгө жана 11 мекеме-ишканага кооптуу абал жаралган.
Ага байланыштуу мэр Эрнисбек Ормоков шаарга 18-марттан тартып өзгөчө кырдаал киргизүү боюнча буйрук чыгарды.
Буйрукка ылайык, Жалал-Абад шаарындагы бардык мекеме-ишканаларда өзгөчө кырдаалдын алдын алуу боюнча нөөмөттөр уюштурулуп, менчигинин түрүнө карабай инженердик техника даярдалат.
12-мартта Чаткал районунун Жаны-Базар айылында 1 миллион метр куб көлөмүндөгү кар көчкү үч сарайды мал жандыктары менен кошо басып калган.
15-мартта нөшөрлөп жааган жаандын кесепетинен кокту-колоттон чогулган суулар Чаткалдын Жаңы-Базар, Курулуш, Кара-Ой айылдарындагы 50дөн ашуун үйдүн короолорун каптап, бир үйгө суу кирип, 11ин суу каптоо коркунучу жаралган. (TB)
