Жогорку Кеңештин депутаты Орозайым Нарматова атасы Көчкөнбай Нарматов Улуттук коопсуздук боюнча мамлекеттик комитетине (УКМК) суракка кирип кеткенин “Азаттык” радиосуна маалымдады. Нарматова атасы анын диплом маселеси боюнча чакырылганын айтууда.
УКМКнын басма сөз кызматы маалыматты тактап берерин билдирди.
"Бүтүн Кыргызстан" фракциясынын депутаты Орозайым Нарматова 14-январда Улуттук коопсуздук комитетине сурак берип чыккан. Атайын кызмат депутат Жалал-Абад мамлекеттик университетинен алган дипломуна байланыштуу чакырылганын билдирген.
Милиция Нарматованы былтыр сентябрда Ош аэропортунан Москвага учуп баратканда кармап Бишкекке алып келген. Ички иштер министрлиги (ИИМ) ал Жазык кодексинин “Расалык, этностук, улуттук, диний же региондор ортосундагы кастыкты (араздашууну) козутуу” беренеси менен айыпталып жатканын кабарлап, ошол эле күнү сурактан кийин бошоткон.
Активисттин Кыргызстанга бир тууган агасын жерге берүү үчүн келгенде кармалганын бир катар саясатчылар, депутаттар жана жарандык коом сындап чыккан.
Нарматова президент Садыр Жапаров абакта жатканда анын активдүү колдоочусу болгон, бирок Жапаров бийликке келгенден кийин саясатын кескин сындап жүргөн. Президент былтыр жыл жыйынтыгын чыгарган басма сөз жыйынында Нарматованын суракка алынышына каршы болгонун маалымдаган.
"Чычкандай кызга эрегишпейм, аны камабагыла деп ИИМден сурандым. Бирок ар бир журналист болобу, блогер болобу сүйлөгөн сөзүнө жооп бериш керек", - деген Жапаров.
Орозайым Нарматова 2020-жылдагы парламенттик шайлоодо дагы "Бүтүн Кыргызстан" партиясынын тизмеси менен шайлоого катышкан. (TSh)
Дагы караңыз
Коронавирустан дагы үч адам каза болдуПрезиденттин кыска мөөнөттүү эмгек өргүүсү аяктады"Тазалык" Кыргызстанда кураштырылган автоунаа сатып алат