Казакстандын президенти Касым-Жомарт Токаев Казакстанда ондогон адамдын өмүрүн алган куралдуу башаламандыкты «мамлекеттик төңкөрүш аракети» деп атады. Мындай билдирүүнү ал 10-январда Жамааттык коопсуздук келишим уюмунун кезексиз онлайн жыйынында жасады.
Токаев «мамлекеттик төңкөрүштүн аракетинин» артында кимдер турганын айткан жок. Ал башаламандыкка чет жерден келгендер катышканын белгилеп, аларды «террорчулар» деп баалады.
Казак президенти тынч акцияга чогулгандардын талаптары аткарылганын айтып, тынч митингдерди андан кийин башталган ызы-чууларга аралаштырбоого чакырды.
Токаев ошондой эле ЖККУнун күчтөрүнүн киргизилиши үчүн Орусиянын президенти Владимир Путинге ыраазычылык билдирди. Ал эми Путин ЖККУ күчтөрү эч качан «түстүү революцияларга» жол бербестигин жана кайсы бир «тышкы кийлигишүү» болгону тууралуу билдирди. Эл аралык күчтөр Казакстанда убактылуу болуп, андан кийин чыгарыларын кошумчалады.
Азырынча башаламандыктарда канча адам көз жумганы так белгисиз. Бийлик буга чейин күч түзүмдөрүнүн 18 кызматкери каза болгонун билдирген.
Кыргызстандын Казакстандагы элчиси Дастан Дүйшекеев Алматыдагы башаламандыкта каза болгондордун арасында кыргыз жараны бар экенин "Азаттыкка" кабарлаган.
Дагы караңыз
Кыргызстан кармалган жарандарынан улам Казакстанга нота жөнөттү Казакбаев: Ар бир жараныбыздын укугу корголотСердюков: ЖККУнун аскерлери кырдаал толук жөнгө салынганча Казакстанда болот