"Кыргыз көмүр" мамлекеттик ишканасы Кара-Кече кенинде тазалоо иштери жүрүп жатканына байланыштуу 15-декабрдан 20-декабрга чейин көмүр казуу токтотулганын маалымдады. Бишкек жылуулук электр борборуна көмүр үзгүлтүксүз тартыла берет.
Кыргызстанда суук түшөрү менен энергетикалык каатчылык сезиле баштады. Өлкөдө электр энергиясы чоң таңкыстыкка учурап, күйүүчү-майлоочу майлардын баасы кескин көтөрүлдү. Ортомчулар менен талаш-тартыштан улам Кара-Кече кенинен көмүр алып келүүдө кыйынчылык жаралууда.
12-октябрда Министрлер кабинети үч айга көмүрдүн наркына мамлекеттик жөнгө салуу киргизген. Бирок баа көтөрүлө берген.
16-ноябрда президент Садыр Жапаровдун кийлигишүүсүнөн кийин Бишкекте 3000 сомдон көмүр сатуучу пункттар иштей баштады. Бирок аларга чоң кезек жаралып, бир кишиге ашып кетсе эки тонна гана сатылууда.