Билим берүү жана медицина тармагынын кызматкерлерин шайлоого байланыштуу иштерге тартууга тыюу салынарын Министрлер кабинетинин төрагасы Акылбек Жапаров бүгүн 23-ноябрда парламенттик шайлоону уюштуруу боюнча республикалык штабдын жыйынында сүйлөп жатып эскертти.
Жапаров бийликтин милдети - жарандардын эркин билдирүүсү үчүн зарыл шарттарды камсыз кылуу экенин белгилеп, добуш берүү бекеттери керектүү жабдуу, байланыш жана интернет менен жабдылганын айтты. Ошону менен катар ал коронавирус пандемиясына байланыштуу ар бир шайлоо бекетинде тийиштүү санитардык талаптар сакталышы керектинин белгиледи.
Шайлоо процессине республикалык бюджеттен 623 миллион сом бөлүнгөнү айтылды.
28-ноябрда өтө турган шайлоонун жыйынтыгында Жогорку Кеңештин 90 депутатынын 54ү Кыргызстан боюнча бирдиктүү округдан партиялык тизме менен, ал эми 36сы бир мандаттуу округдардан шайланып келиши керек. Соңку парламенттик шайлоо Кыргызстанда 2020-жылдын 4-октябрында өткөн. Шайлоо өтө ыплас өткөнүнө нааразылар эртеси күнү Бишкекте митинг өткөрүп, өлкөдө бийлик алмашкан. (RK)
Дагы караңыз
Павлюктун өлүмү үчүн соттолгон Исманкулов мунапыс сурап кайрылдыАлматыда келин үч баласы менен тогузунчу кабаттан боюн таштадыАбдыкеримов Улуттук олимпиада комитетинин президенттигинен кеттиАлматыдагы үрөй учурган окуя: үч бала менен эненин өлүмү