"Кумтөр иши" боюнча кармалган мурдагы премьер-министр Жоомарт Оторбаев Бишкектин Биринчи Май райондук сотунун 20-ноябрдагы чечими менен чет жакка чыкпоо тууралуу тилкаттын негизинде абактан бошотулду. Бул тууралуу аталган райондук соттун басма сөз кызматы кабарлады.
Мекеменин маалыматына караганда, Оторбаевдин бөгөт чарасын өзгөртүү өтүнүчү менен сотко Башкы прокуратура кайрылган.
Кыргыз өкмөтүн 2014-2015-жылдары башкарган Жоомарт Оторбаев "Кумтөр ишине" байланыштуу Улуттук коопсуздук боюнча мамлекеттик комитетти (УКМК) тарабынан 16-сентябрда кармалып, аталган мекеменин тергөө абагына камалган.
УКМК Оторбаев премьер-министр болуп турганда мыйзамдын талаптарын бузуп, “Кумтөр Голд Компани” чет элдик ишканасынын "кызыкчылыгы үчүн буйрук алып, Лысый жана Давыдов мөңгүлөрүн жок кылууга макулдук берген" деп билдирген.
Биринчи май райондук соту 20-ноябрда мурдагы премьер-министр Темир Сариевдин дагы бөгөт чарасын өзгөртүп, эч жакка кетпөө тил каты менен абактан бошотконун билдирген.
«Кумтөр» иши боюнча буга чейин мурдагы президент Аскар Акаев баштаган он беш чакты мурдагы жана азыркы аткаминерлер, Жогорку Кеңештин депутаттары сурак беришкен. Айрымдары камалган. Кээ бирөөлөрү тергөө менен кызматташканы үчүн, айрымдары ден соолугуна байланыштуу үй камагына чыгарылган.(КЕ)
Дагы караңыз
"Кумтөр иши": Сариев менен Оторбаев үй камагына чыктыМигранттар Польшага кирүүгө дагы аракет кылыштыЭкс-премьер-министр Темир Сариев абактан чыктыЗулушев пара алууга шек саналып кармалган прокурор үчүн президенттен кечирим сурады