Кыргызстан Орусиянын "Рособоронэкспорт" ишканасынан Ми-17В-5 тик учагын сатып алат. Андан тышкары, Мамлекеттик чек ара кызматы үчүн "Орлан-10Э" деп аталган учкучсуз аппараттын көп функционалдуу комплекстерин сатып алуу боюнча келишимге да кол коюлду.
30-октябрда Улуттук коопсуздук мамлекеттик комитетинин (УКМК) төрагасы Камчыбек Ташиев "Рособоронэкспорттун" жетекчиси Александр Михеев менен жолугушту. УКМКнын басма сөз кызматы жолугушуу Бишкекте "Ала-Арча" мамлекеттик резиденциясында болгонун билдирди.
Сүйлөшүүнүн жүрүшүндө Ми-8 МТВ тик учактарын оңдоо, аларга тетиктерди жеткирүү жана агрегаттарды түзөтүү боюнча да макулдашылды.
Ташиев менен Михеев Кыргызстан менен Орусиянын ортосундагы аскердик-техникалык кызматташтыкты өнүктүрүүгө байланышкан маселелерди талкуулашты.
Сатып алууларга каражат бюджеттен сарпталат.
Мурдараак Ташиев Кыргызстан Түркиядан да "Байрактар" дронун алып жатканын билдирген.
Дагы караңыз
Бишкек кызыккан "Байрактардын" баркы жана баасы