Америкалык миллиардер Жефф Безостун Blue Origin компаниясы 13-октябрда 90 жаштагы канадалык актер Уильям Шетнерди космоско учурганы жатат. Космостук кеме Бишкек сааты боюнча 20:00дө АКШнын Техас штатынан учуп чыгары кабарланган.
Эгер бул сапар ийгиликтүү болсо, анда Шетнер космосту көргөн дүйнөдөгү эң улгайган адам болуп калат. Аны менен кошо космоско НАСАнын мурдагы инженери Крис Бошуизен, клиникалык изилдөөлөр багытында иш алып барган бизнесмен Глен де Врис жана Blue Origin компаниясынын вице-президенти, инженер Одри Пауэрс да учат. Алардын космоско сапары болгону 10 мүнөткө созулат.
Blue Origin жүргүнчүлөр космоско учуп барып келүү үчүн канча акча төлөгөнүн же кимге акысыз учууга уруксат берилгенин так жарыялаган жок. 1960-жылдары "Жылдыздуу жол" сериалында Капитан Кирктин ролун аткарып, атагы чыккан Шетнер компаниядан ага космоско учуп барып келүү сунушу түшкөнүн айткан.
20-июлда Blue Origin жана "Амазон" компанияларынын негиздөөчүсү Жефф Безос баштаган дагы үч жүргүнчү космосту көрүп келишкен. Безостун компаниясы космостук туризмди өнүктүрүү маселесинде америкалык дагы бир миллиардер Илон Масктын SpaceX жана британиялык бизнесмен Ричард Брэнсондун Virgin Galactic компаниялары менен атаандашып келет.
Дагы караңыз
АКШнын Жогорку соту Царнаевдин ишин карайтСары-Челек коругун кайтарууга милиция кызматкерлери тартылдыБишкек: акимчиликтин кызматкери бала асыроого байланыштуу пара алган деп шектелүүдө Кыргыз-кытай чек арасындагы өткөрмө бекеттерде чектөө алынды