Казакстандын Мангистау облусунун Каракыян районундагы Жетибай мунай кенинде иштеген West Oil Software компаниясынын беш жүздөй жумушчусу 23-августтан баштап иш таштады.
Алар өлкө президенти Касым-Жомарт Токаевге кайрылып, маянаны көтөрүүнү, жумуш шарттарын жакшыртууну жана жетекчилик тарабынан бузулган эмгек укуктарын коргоону талап кылды.
Кайрылууда кымбатчылык өкүм сүрүп турганда айлык-акы жетпей жатканы жана жумушчулардын жашоо абалы начарлап кеткени көрсөтүлгөн.
West Oil Software компаниясы аталган мунай кенин иштеткен «Казмунайгаз» компаниясына сервисттик кызмат көрсөтөт.
Буга чейин Казакстандын Жаңы-Өзөн шаарында "КЕЗБИ" мунай компаниясынын жумушчулары дагы иш таштаган. Алар эмгек шартын жакшыртууну жана маянаны көбөйтүүнү талап кылышкан.