Кыргызстанда быйыл жети айда 3982 жол кырсыгы катталып, 394 адам каза болду. Бул тууралуу 23-августта “Азаттык” радиосуна ИИМдин Жол коопсуздугун камсыздоо башкы башкармалыгынын басма сөз кызматынын өкүлү Тилек Исаев билдирди.
Каза болгон 394 адамдын 44ү балдар экенин белгилеген Исаев кырсыктын негизги себеби жол эрежесинин одоно бузулушу болуп жатканын айтты:
“Дээрлик 85% айдоочунун күнөөсү. Автомашинаны жогорку ылдамдыкта айдаганы, жолдун каршы тилкесине чыкканы, автомашинасынын техникалык абалы, мас абалда рулга отурганы себеп болууда. Жакында Чырпыктыда беш адамдын өмүрүн алган кырсыкта эки айдоочу тең мас абалда экен. Кубакы ашуусунда жети адам каза болгон кырсыкта транспорт каражатынын техникалык абалы талапка жооп бербегендиги”.
Расмий маалыматта айтылгандай, 2020-жылы Кыргызстанда 6126 жол кырсыгы, анын 2925и жети айда катталган. 754 адам каза болгон (анын 93ү бала), алардын 324ү (анын 34ү балдар) жети айда катталган.
2019-жылы 6663 жол кырсыгы катталып, 760 адам (91и бала) көз жумган. (RK)
Дагы караңыз
Чек арада автоунаага таш ыргытылган окуя боюнча иш козголдуОоганстандагы бийлик үчүн күрөш Айсулуу Тыныбекова: Париж Олимпиадасына катышам (видео)Олимпиадада медал уткандар сыйланды (видео)