Муфтий Замир Ракиевдин буйругу менен Нарын облусунун казысы болуп Эрик Молдокулов дайындалды. Бул тууралуу Кыргызстан мусулмандар дин башкармалыгы билдирди.
Нарын облусунун казысы болуп 2011-жылдан бери иштеп келген Мамбетасан Ибраев ден соолугуна байланыштуу арызын жазган. Ага муфтий "Ардактуу казы" наамын тапшырган.
Эрик Молдокулов 2020-жылдын декабрынан бери казынын орун басары болуп иштеп келген. Ага чейин 2011-2014-жылдары Нарын медресесинде мугалим, мүдүр, 2012-2016-жылдары Аалымдар кеңешинин мүчөсү, 2014-жылдан баштап Нарын шаарындагы “Саад ибн Абу Ваккас” мечитинин имамы болуп иштегени айтылат.
Молдокулов 36 жашта. Кыргызстан ислам университинин араб тили жана шарият факультетин, Нарын мамлекеттик университетинин тарых факультетин бүтүргөн.