Кыргызстан менен Тажикстандын чек арасында 28-апрелден 1-майга чейин уланган куралдуу жаңжалда жабыркагандар жыл аягына чейин салыктан бошотулду. Экономика жана финансы министрлигинин токтомуна ылайык 28-апрелден 1-майга чейинки убакта чек арадагы куралдуу жаңжал өзгөчө абал окуяларына теңдештирилди. Министрлик жаңжалда жабыркаган жарандардын тизмесине киргизилген салык төлөөчүлөрдү 2021-жылдын 31-декабрына чейин салыктын бардык түрүнөн бошотууну сунуштаган.
Токтом долбооруна ылайык, бул жеңилдик акциз менен сатылуучу товарларга, мунай жана тоо-кен тармагында иштеген ишканаларга тиешеси жок.
Жабыркаган жарандар 1-октябрга чейин салык төлөөнү бир жылдан көп эмес убакытка узартуу жөнүндө арызды банк кепилдигисиз эле бере алышат. 1-октябрга чейин камсыздандыруу төлөмдөрүн узартып төлөө боюнча арыз менен салык кызматына кайрыла алышат. Ошондой эле, камсыздандыруу төлөмүн мөөнөтүндө төлөбөгөнү үчүн туумдар 1-апрелден 1-октябрга чейинки аралык үчүн алынбайт.
Бул жеңилдик кыргыз-тажик чек арасында жабыркаган айылдардан тышкары жайгашкан ишканаларга жана алардын филиалдарына каралган эмес.
28-29-30-апрелде жана 1-майда болгон кыргыз-тажик чек арасындагы куралдуу жаңжалда 36 кыргызстандык курман болуп, 180ден ашуун адам жаракат алды. Тажик тараптан 19 адам өлүп, 87 киши жаракат алганы расмий түрдө жарыяланды.(ZKo)