Бишкектин Биринчи май райондук соту мурдагы премьер-министр Өмүрбек Бабановду эки айга, 31-июлга чейин камакка алуу тууралуу чечим чыгарды. Ал Улуттук коопсуздук комитетинин абагында кармалат.
“Жактоочулар келтирген жүйөлөрдү такыр эске алган жок. Тергөөчүнүн гана айткандарын негиз кылып чечим чыгарды. Өмүрбек Бабанов бул иш толугу менен абсурд экенин айтты. Сот жактоочулардын келтирген жүйөсүн эске алган жок”, - деди саясатчынын жактоочусу Амантур Абдрахманов.
Бабановду 31-майда “Кумтөр иши” боюнча Улуттук коопсуздук комитети кармаган.
Өмүрбек Бабанов 2011-2012-жылы премьер-министр болуп турган. Ал өзүнө козголгон кылмыш ишин “абсурд” деп атады.
Атайын кызмат бир катар аткаминерлерге “Кумтөр иши” боюнча “Коррупция” беренеси менен айып койду.
Мурдагы депутаттар Исхак Пирматов жана Талантбек Узакбаев да бүгүн эки айга камакка алынды.
31-майда кечинде Жогорку Кеңештин депутаттары Асылбек Жээнбеков менен Төрөбай Зулпукаров эки айга камалган. Зулпукаров “Мыйзамсыз баюу” боюнча айыпталып жатат.
Дагы бир мурдагы өкмөт башчы Игорь Чудинов бул иш боюнча күбө катары көрсөтмө берип чыккан.
УКМКнын төрагасы Камчыбек Ташиев кендин ишмердигин иликтөөнүн алкагында бир нече киши камакка алынарын эскерткен. Ташиев 2-июнда журналисттердин суроолоруна жооп берип жатып, Кумтөргө байланыштуу бир катар чиновниктер, депутаттар мурда иштеп кеткен президенттерди да жоопко тартыла турганын айтты.
1-июнда Жогорку Кеңештин депутаттары Рыскелди Момбеков, Дастан Жумабеков, мурдагы депутат Максат Сабиров да УКМКда сурак берди. (МТа)
Дагы караңыз
Түркия: Кримтөбөл бийликтин чуусун чубай баштады Шаардык кеңеш коомдук транспорттун жол киресин көтөрүү маселесин карайт Кыргызстандын БУУнун Женевадагы кеңсесиндеги өкүлү дайындалды Бабанов Кумтөр иши тууралуу: бул толук аша чапкандык, абсурд (видео)Ташиев: Кумтөргө байланыштуу соңку камоолордо саясий куугунтук жок (видео)Ташиев: Кумтөр боюнча керек болсо мурдагы президенттерди да жоопко тартабыз (видео)