Борбордук шайлоо комиссиясы “Эмгекке” чара көрбөсө, “Ак-Бата” депутаттык мандаттан баш тартат. Бул тууралуу партия лидери Нариман Түлеев “Азаттыкка” билдирди.
Түлеевдин айтымында, "Ак-Бата" жаңы шайлоо өткөрүүнү, ага “Эмгек” партиясын катыштырбоону талап кылууда.
“Бир айдын ичинде “Эмгек” партиясы эмне гана кылган жок. Болгон үй комитеттерин, квартал башчыларын сатып алыптыр. Бир да башка партияларды жолоткон жок. Бардык жергиликтүү бийлик, акимдер иштеди. Бул ишке Борбордук шайлоо комиссиясы, Бишкек аймактык шайлоо комиссиясы көзүн жумса, милиция көңүл бурбаса эмне кылыш керек? Бир гана ушул жол калды. Ушинтип Салымбековдорду токтотуш керек болуп жатпайбы”, - деди Түлеев.
“Ак-Бата” партиясы тараткан билдирүүдө 11-апрелде өткөн Бишкек шаардык кеңешинин депутаттарын шайлоо одоно мыйзам бузуулар, добуш сатып алуу, административдик ресурс колдонуу менен өткөнү айтылат.
Бишкек шаардык кеңешине өткөн шайлоодо “Ак-Бата” партиясы экинчи орунду алган.
Бишкек шаардык кеңешине шайлоо 11-апрелде болгон. Бишкек шаарында жети пайыздык босого чегинен “Эмгек”, “Ак-Бата”, КЭДП, “Ата-Журт Кыргызстан”, “Ынтымак”, “Биздин Эл” партиялары өткөн. Бишкек аймактык шайлоо комиссиясы добуш сатып алуу фактысы боюнча Кыргызстан элдик демократиялык партиясын шайлоодон четтетип, аны Борбордук шайлоо комиссиясы, Жогорку сот колдогон. (MTa)
Дагы караңыз
"Актөбө" футбол клубу коронавируска каршы эмделгендерди гана беттешке киргизет Ооганстан: АКШ коопсуздук үчүн учактарды тарттыЖурналист Канат Каниметов өзүнө кылмыш иши козголгонун билдирдиОшМУ: Тажикстандык студенттер 26-апрелден тарта аралыктан окууга кеткен