Экономика жана финансы министрлиги медкызматкерлердин эмгек-акысын көтөрүү үчүн кошумча 1 миллиард 131 миллион сом таап, жумшай турган болууда.
Бул тууралуу мекеменин жетекчиси, вице-премьер-министр Улукбек Кармышаков 9-апрелде брифингде билдирди.
Анын айтымында, 1-апрелден тартып үй-бүлөлүк дарыгерлердин маянасы эки эсеге жогорулады. 1-июлдан тартып саламаттык сактоо тармагында иштегендердин баарынын айлыгы 50% көбөйтүлөт.
Министр кошумча каражаттын булагын тактаган жок.
Үй-бүлөлүк дарыгерлер борборунун кызматкерлеринин маянасы 100% жогорулаганын буга чейин президент Садыр Жапаров жарыялаган. Ал башка тармактарда иштегендердин айлыгын жана пенсия, жөлөк пулду көтөрүүгө каражат изделип жатканын, ансыз бюджет туруштук бере албай турганын билдирген.
Учурда үй-бүлөлүк дарыгерлердин орточо айлыгы бир штаттык бирдикте 8598 сомду түзөт. Жогорулагандан кийин ал 17 198 сом болот. (NT)