Бишкек мэриясынын Билим берүү башкармалыгы окуучулардын ата-энелерине кайрылып, мектептерди толук ачуу маселесин чечүү үчүн убакыт керектигин, ага чейин чыдамкайлык талап кылынарын балдарга түшүндүрүүнү өтүндү.
27-февралда мекеменин басма сөз кызматы окуучулар аралыктан окууга каршы нааразылык акциясын уюштурууга камынып жатышканы тууралуу маалымат бар экенин билдирди.
Маалыматта мэрия "онлайн окуунун балдар үчүн да, ата-энелер үчүн да оордугун түшүнүп турганын, бирок балдардын ден соолугу, алардын коопсуздугу биринчи орунда экендигин", билдирди.
Расмий маалыматка караганда, бүгүнкү күндө борбор калаада 2 мектеп коронавируска байланыштуу карантинге жабылып турат.
Бишкекте коронавирус эпидемиясынан улам 2020-жылдын март айында жабылган мектептер толук ачыла элек. Азыр 1, 5, 9 жана 11-класстын гана окуучулары кадимки тартипте окуп жатышат, калган класстар аралыктан билим алууну улантууда. Бул илдеттен Кыргызстанда 1,5 миңдей адам каза болду, оору жугузуп алгандар 90 миңге чамалады. (RK)