Борбордук шайлоо комиссиясы (БШК) 2020-жылдын 4-октябрындагы парламенттик шайлоого катышкан бардык 16 партиянын төккөн күрөөсүн толугу менен кайтарып берет.
БШКнын эсебинде күрөөдө партиялардын 80 миллион сом каражаты бар. Бул тууралуу «Азаттыкка» БШКнын мүчөсү Абдыжапар Бекматов кабарлады:
«Мурда шайлоо боюнча мыйзамдарда шайлоонун жыйынтыгы жокко чыгарылса күрөөнү кайтарып берүү тууралуу нускамалар жок болчу. Жогорку Кеңеш бул багытта мыйзамдарга толуктоо киргизип, 27-январдагы отурумда биринчи окууда кабыл алынды. Эми кийинки окууларда кабыл алынса бардык партиялардын күрөөлөрү кайтарылып берилет».
2020-жылдын 4-октябрында болгон шайлоого 16 саясий партия катышкан. 5-6-октябрда шайлоонун жыйынтыгына каршы толкундоодон соң анын жыйынтыгы жокко чыгарылып, Кыргызстанда бийлик алмашкан.
Шайлоого катышкан партиялардын бири «Реформа» 2020-жылдын ноябрь айында күрөөнү кайтарууну талап кылган арыз менен кайрылган.
Кыргызстандын шайлоо жөнүндө мыйзамына ылайык, парламентке барууга ат салышкан партиялар алдын-ала 5 миллион сом күрөөнү БШКга берүүгө тийиш. Азыр иштеп жаткан жобого ылайык шайлоочулардын 7% ашуун добушун алган партияга күрөө кайтарылат. (BCh)
Дагы караңыз
Пакистанда сот кабарчыны өлтүргөн адамды түрмөдөн бошотту Бишкек: Шаардык кеңеш деталдык пландоо долбоорун кайра карайтБишкектеги 19 мектеп жана бала бакча газ менен жылытууга өткөрүлөтСот Атамбаевди үй камагына чыгарган жокАлматыда коронавируска байланыштуу чектөөлөр күчөтүлдү