Экономикалык кылмыштарга каршы күрөш боюнча мамлекеттик кызматтын (Финансы полициясы) мурдагы төрагасы Бакир Таиров мыйзамсыз акча алган деген шек менен кармалды. Бул тууралуу Улуттук коопсуздук боюнча мамлекеттик комитет (УКМК) кабарлады.
Маалыматта айтылгандай, мекемеге караштуу Коррупцияга каршы күрөш кызматы Таиров иштеп жаткан учурда мамлекеттик органдардын биринин жетекчисинен ири суммада акча каражатын алганын аныктаган.
Маалыматта Таиров ири сумманы берүүгө мекеме жетекчисин 2020-жылдын октябрь айында өткөн Жогорку Кеңештин шайлоосунун алдында партиялардын бирин каржылоо деген шылтоо менен мажбурлаганы белгиленген.
Сотко чейинки териштирүүнүн алкагында, Бакир Таировдун башка ишкерчилик чарбаларынан да ушундай жол менен акча алган учурлары боюнча тиешелүү ыкчам иликтөө иштери жүрүп жатат.
Бакир Таиров Финансы полициясында 2018-жылдын 29-апрелинен 2020-жылдын октябрдын ортосуна чейин иштеген. Өлкөдө бийлик алмашуудан кийин нааразылык акцияларынын катышуучусу Сыймык Жапыкеев 17-октябрда жаңы премьер-министр Садыр Жапаровдун буйругу менен мекемени жетектеп калган.
Сыймык Жапыкеев мурда прокуратурада иштеген. Кийинчерээк «Чоң казат» уюмунун лидерлеринин бири катары таанылып, ушул аталыштагы партия менен 4-октябрда өткөн парламенттик шайлоодо ат салышкан. Кыргызстандагы бир нече саясатчынын атын атап, аларды күмөндүү жолдор менен байыган деп айыптап жүрөт. (ErN)
Дагы караңыз
Евробиримдик Түркияга каршы санкцияларды узарттыЕвробиримдиктин лидерлери Украинага байланыштуу Орусияга каршы экономикалык чектөөлөрдү улантууну жактырыштыАКШнын кеңеш берүүчүлөр комиссиясы «Pfizer/BioNTech» вакцинасын жактырды Трамп «талаштуу» деген төрт штаттагы Байдендин жеңишин кайра карап чыгууну талап кылуудаАКШ Матраимовдун аялын да «кара тизмеге» киргизди