Президент Сооронбай Жээнбеков коомдук-саясий чөйрөнүн өкүлдөрү менен саясий кырдаалды талкуулады. Бул жолугушууга премьер-министр Садыр Жапаров келген жок. Бул тууралуу Жогорку Кеңештин мурдагы төрагасы Абдыганы Эркебаев «Азаттыкка» билдирди.
Эркебаевдин билдиргенине караганда, жолугушууда президент Сооронбай Жээнбековдун кызматтан парламенттик шайлоо өткөндөн кийин кетиши өлкөнүн туруктуулугу үчүн маанилүү экендиги белгиленди. «Жээнбеков Жапаровго «үч күндөн кийин кетем» деп айтпаганын бышыктады», - деди коомдук ишмер.
Маалыматка караганда жолугушууга Роза Отунбаева, Исмаил Исаков, Феликс Кулов, Сыртбай Мусаев баштаган ондон ашык коомдук-саясий ишмерлер катышты.
Буга чейин айрым маалымат каражаттары 15-октябрда Садыр Жапаров менен Сооронбай Жээнбековдун сүйлөшүүсү уланып жатканын кабарлаган.
14-октябрда президент менен премьер-министрдин сүйлөшүүсүнөн кийин президент Сооронбай Жээнбеков өлкөдө парламенттик шайлоо өтүп, президенттик шайлоо дайындалган соң кызматтан кетерин билдиргени тууралуу маалымат тараган.
Ошол эле учурда өкмөт башчы Садыр Жапаров жолугушуудан кийин Өкмөт Үйүнүн алдында чогулган тарапташтарынын алдына чыгып, «президент кетерин» билдирип, «эгер эртең да жыйынтык чыкпаса, мен өзүмдөн жоопкерчиликти алып салам» деп, тарапкерлерин 15-октябрда саат 11ге чейин тараткан.
Президент менен премьердин 14-октябрдагы кечки сүйлөшүүсүнө Камчыбек Ташиев, Талант Мамытов, Курманкул Зулушев да барганы кабарланган.
Ушу тапта Бишкектин эки жеринде – Эски аянтта жана «Ала-Арча» мамлекеттик резиденциясынын жанында мамлекет башчынын кызматтан кетишин талап кылган митингчилер топтолуп турат.
Дагы караңыз
Өкмөт: Садыр Жапаров президент менен жолугушууга ден соолугуна байланыштуу бара алган жокШыкмаматовго, Жапыкеевге иш козголгонун Башкы прокуратура бышыктаган жокШайлоо мыйзамдары кайым айтышка жол ачтыБатукаев иши: Сот Салянованын өтүнүчүн четке какты