Эртең мененки саат 8де шайлоо бекеттери ачылары менен добуш берүү үчүн кезек күткөндөр көбөйгөнү байкалды.
Жер-жерлердеги кабарчыларыбыз айрым адамдар добуш берүүчүлөрдү чакан автобустар (маршруткалар) менен ташып келип жатканына күбө болушууда.
Ошондой эле Интернеттен алынган видеолордон белгисиз кишилер шайлоо участкаларында кишилердин тизмесин көтөрүп жүргөнүн, урналарга жакын отуруп алганын жана кичи автобустар менен шайлоочуларды добушканаларга ташып атканын көрүүгө болот.
Талас шаарында, Кара-Сууда, Ошто добуш берүү үчүн кезек күткөндөр көп болуп жатат. Алардын катары мүнөт сайын калыңдап жатат.
Таласта добуш берүүчүлөр айылдардан №2 форма менен келгендер көп болгонун, мунун айынан шаардыктардын өзү добуш бере албай жатканын айтып, кабарчыбызга даттанышты.
Күндүн биринчи жарымында Талас шаардык добушканаларда узун кезек пайда болду. Жалпы облус аймагында 117 шайлоо тилкеси, 149 058 шайлоочу бар. №2 форма менен 17151 адам катталган. Алардын жети миңден ашыгы Талас шаарынын он участогунда каттоого турган. "Азаттык" Таластагы айылдардан шаарга келип, добуш берген учурларды тартып алды.
Ошто шайлоочулардын көптүгүнөн кезек талашып урушуп жатышат.
Добушканаларда кезек күткөндөр көп
"Азаттыктын" WhatsApp номуруна келген видеолордун топтомунда шайлоонун жүрүшүн көрүүгө болот. Анда шайлоо бюллетенин сүрөткө тарткан учур да чагылдырылган.
Ал арада Интернетке шайлоо участоктордун биринде УИКтин мүчөлөрүнүн кийимин кийгендер шайлоо бюллетендерин урнага массалык түрдө салып аткандыгын чагылдырган видео тарады. Азырынча бул факты тууралуу БШК маалымат тарата элек.
Борбордук шайлоо комиссиясы түшкө чейин 21 арыз түшкөнүн кабарлады. Арыздардын басымдуу бөлүгү жымжырттык күнү үгүт иштерин жүргүзгөнү, шайлоочуларды массалык ташуулар, партиялардын байкоочуларынын шайлоочуларды добуш берүү кабинасына чейин коштоп жүрүшкөнү, үкөктөрдүн жанына жакын отурганы өңдүү дооматтардан турат.
Мындан тышкары журналисттердин добушканаларга киргизилбей жатканы тууралуу да даттануулар көп болуп жатат. Бул тууралуу БШКнын мүчөсү Тынчтыкбек Шайназаров бүгүн, 4-октябрдагы басма сөз жыйынында билдирди. Анын айтуусунда, ар бир арызга Боршайком күч кызматтары менен чогуу көңүл буруп, иликтөө иштерин жүргүзөт.