Ала-Букада милиция 33 жаштагы келиндин өлүмүн Жазык кодексинин «Өзүн өзү өлтүрүүгө жеткирүү» деген беренесинин негизинде иликтеп жатат. Бул тууралуу «Азаттыкка» Жалал-Абад облустук ички иштер башкармалыгынын басма сөз кызматынын өкүлү Шеркул Турганбаев билдирди.
Анын айтымында, маркумдун сөөгү экспертизадан өткөрүлгөн, азырынча жыйынтык чыга элек. Окуя Баймак айылында 23-сентябрда эртең менен болгон. Келиндин асынган сөөгү сарайдан табылган.
«Үйүнүн короосунда пресс жипке асынып алгандыгы жөнүндө маалымат милицияга келип түшкөн, - деди облустук милициянын өкүлү. - Ыкчам тергөө тобу барып, материалдар чогултулган жана Ала-Бука райондук ички иштер башкармалыгында Кылмыштар менен жоруктардын бирдиктүү реестрине каттоого алынган».
Окуянын чоо-жайы тууралуу маркумдун күйөөсү менен байланышуу мүмкүн болгон жок. Келиндин кайын журту ал өз жанын өзү кыйганын айтып жатат.
Ал эми маркумдун төркүнү окуяга күйөөсүнүн зомбулугу себеп болду деп арызданууда. Анын таэжеси Пайзи Абдисаматова «Азаттыкка» билдиргенине караганда, кечинде телефон чалып, күйөөсү ур-токмокко алып жатканын айткан жана арачага түшүүгө чакырган.
15 жыл чогуу жашаган жубайлар төрт кыздуу болушкан – улуусу 15те, кенжеси бир жашар ымыркай.
Укук коргоочулар Кыргызстанда үй-бүлөлүк зомбулук күчөгөнүн айтып жатышат. Быйыл 1-январда Кочкордо 37 жаштагы келин, 3-январда Баткенде 26 жаштагы келин күйөөсүнүн ур-токмогунан көз жумган. 4-январда Каракол шаарында аялына бензин чачып өрттөгөн эркек кармалган. 12-февралда Сокулукта 42 жаштагы келинге күйөөсү бензин чачып өрттөп жиберген. 6-мартта Бишкекте мурда сот болуп иштеген адам аялын бычактап өлтүргөн. 3-апрелде Бишкекте бир келин төртүнчү кабаттан секирип кетип, ооруканага түшкөн. Социалдык түйүндөрдө ал зордуктоодон качканы айтылган.
2018-жылы ала качуудан куткарылган Бурулай милициянын имаратында бычакталып өлтүрүлгөн. (TB)