Бишкектин Тыналиев көчөсүндөгү жаңы курулуп жаткан көп кабаттуу үйдө өрт чыкканы тууралуу Өзгөчө кырдаалдар министрлигинин өрт өчүрүү бөлүмүнө 16-сентябрь күнү, саат 22:23тө маалымат түшкөн.
Бишкек шаардык өрт өчүрүү башкармалыгынан үч өрт өчүрүүчү бөлүм тиешелүү техникасы менен барды. Бул тууралуу «Азаттыкка» ӨКМдин басма сөз кызматкери Элзат Абдраимова билдирди. Анын айтымында, саат 23:30га карата өрт чектөөгө алына элек.
Баштапкы маалыматтар боюнча өрттөн жабыркагандар жок. Өрттү өчүрүү иштери уланууда.
Күбөлөрдүн маалыматына караганда, өрт 14 кабаттуу үйдүн 13-кабатынан чыккан. Ушу тапта тилсиз жоо өчүрүлгөнүн кичи райондун жашоочулары билдиришти. Социалдык тармактардагы видео тасмаларда өрттөнүп жаткан бийик кабатка өрт өчүрүүчүлөрдүн суусу жетпей жатканын көрүүгө болот. (ZKo)