Сириянын Алеппо шаарындагы көркөм жайларга кайрадан экскурсия уюштурула баштады. ТАСС агенттиги бул тууралуу тарыхчы Абдурахим Кадурга таянып жазды.
«2016-жылы жоочуларды сүрүп чыгарышкан соң калаага келип, шаардын абалын көрүп ыйлагам. Бийлик анын баарын тазалап, жашоочулар кайтып келе башташты», - деди Кадур.
Тарыхый эстеликтерге бай Алеппо шаары террорчулар менен кагылыштарда кыйраган.
2016-жылы калаанын борбордук бөлүгү согушкерлерден тазаланганы менен жака-бели жоочулардын колунда кала берген. 2020-жылдын февралында өкмөт армиясы шаарды толугу менен өз көзөмөлүнө өткөргөн.
Сирияда 2011-жылы оппозиция менен президент Башар Асаддын бийлигинин ортосундагы тирештин фонунда террордук уюмдар да күч алып, бир кездери тарыхый жайлары менен таанылган өлкөдө канабайрам башталган. Миллиондогон тургундар үй-жайын таштап кетүүгө аргасыз болду.